Upworkda buyurtma oliş, raqobat va reyting

Frilansda raqobat tajribali professionallarda kam, yangi iş boşlaganlarda va işlaşni bilmaydiganlarda esa yuqori. Öz navbatida mayda va oson işlarda raqobat juda katta böladi, katta loyihalar va qiyin işlarda raqobatçilar kamroq.
Upwork reytingi
Upworkda frilanserlar reytingi mavjud bölib, u asosida mijozlar frilanser haqida qisqaça tasavvurga ega böladilar. Reyting frilanser mijozlarining baholari (feedback) asosida şakllanib boradi. Buyurtmaçi frilanserga quyidagi yönalişlar böyiça 1 dan 5 tagaça yulduz körinişida baho beradi:
- bilimi (skills)
- iş sifati (quality)
- işlaşga tayyorligi (availability)
- öz vaqtida bajargani (deadlines)
- aloqasi (communication)
- tezkorligi (cooperation)
6 ta punkt böyiça baholar qöşilib 6 ga bölinadi va örtaça baho çiqariladi. Bu baho juda muhim ahamiyat kasb etib, frilanser profilida körinib turadi va navbatdagi loyihalar uçun yordam beruvçi, yoki aksinça xalaqit qiluvçi vositaga aylanadi.
Agar buyurtmaçi işingizdan qoniqmasdan sizga past baho qöygan bölsa, uning barça tölagan pullarini qaytarganingizdan söng (refund), qöyilgan baho profilingizda körinmaydi, ya'ni uning bahosi hisobga olinmaydi. Ammo sifatli işlab, öz vaqtida işni topşirişingizni maslahat bergan bölardim, boşoğriği kamroq :)
2015-yildan boşlab işni muvaffaqiyatli bajariş reytingi (Job success score) ham qöşildi. Bu reyting mijozning mahfiy bahosi asosida şakllanib 0 dan 100% gaça oraliqda böladi. Bunda yomon reytingni ortga qaytarib bölmaydi ammo bir neça muvaffaqiyatli bajarilgan işlardan söng umumiy reytingni kötariş mumkin.
Tartibli va tajribali frilanserlar uçun Upworkda eng qiyini - birinçi işni boşlab/tugatib, mijozning bahosini oliş, sababi saytdagi frilanserlarning deyarli yarmini reytingi yöq profillar taşkil qiladi. Olingan birinçi 5 yulduz va 100% job success score'dan söng keyingi işlarni oliş yengillaşadi.
Frilanserlar örtasida raqobat
"Oson iş uçun raqobat katta" qoidasi har doim amal qiladi, şuning uçun "PSD dan HTMLga ögirib beriş" yoki $100 ga "Wordpress sayt yasaş" kabi işlarni oliş uçun juda katta raqobat böladi. Agar siz şunçaki html-verstka yönalişida Upworkda işlamoqçi bölsangiz, katta orzu-havaslaringizni bir çetga surib qöyişingizni maslahat beraman:
- sizning raqobatçilaringiz arzon iş kuçi bölgan hind, bengal, filippin frilanserlari. Ulardan loyihani tortib oliş uçun, ular kabi arzon narx qöyişingiz kerak. Ularning kuni $5 ga ham ötaveradi. Sizniki esa yöq.
- arzon narxli iş qöygan buyurtmaçilarning 90% qismi "неадекват" bölişadi. Noinsofning injiqliklarini yoki tişingizni tişingizga qöyib bajarasiz, yoki yomon baho orttirib olasiz.
Agar frontendni yoqtirsangiz, sabr qilib avval Javascript, söngra React/Angular'ni örganing. Oddiy HTML verstkaning özi yetarli emas. Sönggi vaqtlarda, verstalşiklarning nonini yarimta qiladigan Wordpress şablonlar, ayniqsa Divi, Avada ommalaşib ketdi. HTML kod yozib ötirişning keragi bölmay qoldi.
Şuningdek, eng köp iş takliflari PHP tilida bölsa ham, PHPning özini bilgan bilan iş bitmaydi. Hozir Laravelga backend dasturçi sifatida talab yuqori.
Kontent boşqaruv tizimlari (CMS, dvijok) böyiça Wordpressda iş köp. Ammo Wordpress uçun arzon iş kuçi ham yetarli darajada. CMSlardan Magentoga talab katta, iş topiş nisbatan oson Shopify ham ança ommalaşgan.
Yuqorida sanab ötilganlardan birini professional mahsulot yarata oliş darajasida örganiş Upworkdagi karyerada asqotadi va iş olişda kamroq raqobatçilarga duç kelasiz.
Qanday qilib raqobatda yutib çiqiş mumkin?
Albatta, 5 yulduz va 100% job success score sizga işni kafolatlab qöymaydi. Buyurtmaga taklif berişda ba'zi qoidalar mavjud:
- Avvalo öz profilingizni töldiring. Profil 100% töldirilgan va tekşiruvdan ötgan (verified) bölişi kerak.
- Işni tugatiş vaqtini (term, deadline) töğri kiriting. 2 hafta vaqt ketadigan işga 1 hafta deb yozib, har kuni 15 soatdan işlayman deb öylamang. Foydasi yöq.
- Demping ya'ni odatdagidan arzon narx qöymang. Arzoniga uçadigan buyurtmaçi köp hollarda noinsof çiqadi. Tajribali buyurtmaçilar özi beradigan işining tahminiy narxi va muddatini bilişadi. Arzon aytilgan narx şubha keltirib çiqarişi mumkin.
- Birinçilardan bölib taklif (bid) yuboring. Birinçi taklif yuborgan frilanser röyhatda birinçi bölib turadi. Köpinça mijozlar takliflarning faqatgina birinçi 10-15tasi bilan çeklanadilar. Siz ham google qidiruvida 2-sahifaga ötmaysizku, şunga öxşaş holat. :D
- Mijozga xat yoziş jarayonida özingizni maqtamang, buyurtmaçiga işida qanday super-puper dasturçi işlaşidan köra dasturçining iş mazmunini töğri tuşunişi muhimroq. Qolaversa sizning profilingiz va baholaringiz siz haqingizda barçasini körsatib turadi.
- Avvaldan tayyorlab qöyilgan avtomatik xatlarni yubormang. Töğri, birinçi bölib taklif yuboriş muhim, ammo avtomatik yoziladigan xatlar köpinça e'tiborsiz qoldiriladi. Iş mazmuni böyiça yozing, savollaringiz bölsa bering. Buyurtmaçi işi böyiça töğri savol bergan frilanserni qadrlaydi.
- hamma işga ham taklif yuboravermang. Bir oyda 30tagaça taklif yuboriş mumkin. Ketma-ket 2 oy yuborgan takliflaringiz javobsiz qolsa, Upwork sizni işlaşni bilmaydigan frilanser deb hisoblaydi va profilingizni blok qiladi. Blok qiliş yangi va köp yillik frilanserlar uçun bir xil amal qiladi.
- ingliz tilida gaplaşa oladigan bölsangiz, nur ustiga a'lo nur. Ba'zi AQŞ va Avstraliyalik buyurtmaçilar intervyuni skype'da audio/video sözlaşuv körinişida olib borişni ma'qul körişadi, şuning uçun frilanserlardan ingliz tilida sözlaşa oladiganini tanlaşadi.
Mijoz sizga javob yozsa, sizni intervyuga çaqirgan hisoblanadi. Demak taklif qabul qilinişining birinçi bosqiçi muvaffaqiyatli tugadi deb hisoblaş mumkin böladi.
Connectlar
Upwork frilanserlarga bir oyda 60ta connect beradi va konnektlar taklif yuboriş (bid) uçun işlatiladi. Bitta taklif uçun 2ta connect kerak, demakki bir oyda 30ta taklif yubora olasiz. Mijoz javob bersa, bermasa connectlar qaytarib berilmaydi. Connectlar faqat bir holatda qaytariladi - agar mijoz e'lon qilingan işni boşlamay, uni öçirib yuborsa taklif kiritgan frilanserlarga connect'lari qaytarib beriladi.
Tajribali frilanserlarni mijozlar özi topib, intervyu uçun taklif yuborişadi. Bunda frilanserning konnektlari kamaymaydi.
Menimça raqobat haqida yetarliça yozildi. Yana qaytaraman, tajribali professional dasturçi-frilanserlar uçun raqobat kam, Upworkda osongina kötarilişlari va hattoki ba'zi ustunliklarga ega Top rated frilanserlar qatoridan joy olişlari mumkin.